بعدني اشتاكلك واتذكرك دوم
وملامح صورتك تشغل خيالي
واذوب واشتهيك اتعودلي انوب
واشمنك هوى ويرتاح بالي
*******
احبك مو مثل باقي اليحبون
لحد ما اشتهيك اتصير زادي
مكان الغيركم ما باقي بالروح
ولا ظن يرهم الغيرك ودادي
جنت وياك اضوكن فرحة العيد
ومن دونك يمر العيد عادي
بكلب ابيض عشتها وياك الايام
وغبت عني وغطس كلبي بسوادي
حدادي عليك صدكـ تارس الروح
وبعد لتظن افك حزني وحدادي
اكبالي اتصير كلما يكبل الليل
وحنيني الشوفتك يكبر اكبالي
وتهل دموع عيني اتسولف وياك
واكلك شوفني اشصاير بحالي
**********
دوم اتمنى ابوس اجفوفك ابشوكـ
واشبع شوف من ذيج الشفايف
يمن طولك غصن ويغازل الريح
وعليك من النسيم الهاب خايف
معود بس تعال وزورني بطيف
اضلوعي اتصير لجدامك مضايف
مو بالخمر صدكـ بيك سكران
وما اصحه واظل سكران حالف
انا من الشوكـ اخاف اتسودن عليك
واتسودن صدكـ مو بالسوالف
ادلل بيك دمعة بطارف العين
عفتني وعفت دمعاتي ودلالي
وكمت انشد عليك العين كل ساع
هم يرجع الي ويسمع سؤالي
***********
يا بلسم جروحي وسلوة اغناي
ياغبشت الدنيا وكل فرحتي
ابسبب فركاك بين شيب بالراس
وباكـ الوكت من شفتي ضحكتي
واكول انساك بلكي وباجر ارتاح
واشوف ابوجنتي اترسمك دمعتي
جنت شمعتي حياتي التطرد الليل
وغيرك ابد ما يصلح شمعتي
منك مو بعد ما شبعت الروح
ولا ضاكت ندى شفافك وردتي
منو مثلي محب يتوسل الموت
بلكي ابموته ايشوفك يغالي
ضعت من بين اديه وصارت الآه
تونس الروح من تخطر ابالي